ലോക്ക് ഡൗണ് നിയന്ത്രണങ്ങള് ലംഘിച്ചതിന് ബിഗ് ബോസ് മലയാളം ഷൂട്ടിംഗ് നിര്ത്തിവെക്കാന് തമിഴ് പൊലീസ് ഉത്തരവ്. ചെന്നൈ ചെംബരവബക്കം ഇ.വി.പി സിറ്റിയിലുള്ള ബിഹ് ബോസ് മലയാളം ഷൂട്ടിംഗ് സ്റ്റുഡിയോയും തമിഴ്നാട് റവന്യു വകുപ്പ് അടച്ചുപൂട്ടി സീല് ചെയ്തു. ബിഗ് ബോസ് സെറ്റില് എട്ട് പേര്ക്ക് കൊവിഡ് റിപ്പോര്ട്ട് ചെയ്തതായും ദ ഹിന്ദു റിപ്പോര്ട്ട് ചെയ്യുന്നു.
സിനിമാ-സീരിയല് ഷൂട്ടിംഗ് നിര്ത്തിവെക്കണമെന്ന ലോക്ക് ഡൗണ് നിര്ദേശം ബിഗ് ബോസ് ടീം ലംഘിച്ചെന്നാണ് പരാതി. തമിഴ് നാട് റവന്യുവകുപ്പിലെ തിരുവള്ളുവര് ഡിവിഷനിലുള്ളവര് പൊലീസുമായി ചേര്ന്ന് നടത്തിയ നീക്കത്തില് മത്സരാര്ത്ഥികളെയും സാങ്കേതിക പ്രവര്ത്തകരെയും സ്റ്റുഡിയോയില് നിന്ന് മാറ്റി. നിരോധനം ലംഘിച്ച് ബിഗ് ബോസ് ഷൂട്ടിംഗ് തുടരുകയായിരുന്നുവെന്ന് റവന്യു ഡിവിഷണല് ഓഫീസര് പ്രീതി പര്കവി. ലോക്ക് ഡൗണ് ലംഘനത്തിന് ഒരു ലക്ഷം പിഴ ചുമത്തിയതായും റിപ്പോര്ട്ടുകളുണ്ട്. നടന് മണിക്കുട്ടന്, നോബി, എന്നിവരുള്പ്പെടെ ഏഴ് മത്സരാര്ത്ഥികളെ ഐസൊലേഷനിലേക്ക് പൊലീസ് മാറ്റി.
നൂറ് ദിവസം ഫിലിം സിറ്റിയിലെ ബിഗ് ബോസ് വീട്ടില് താമസിച്ച് വിവിധ മത്സരങ്ങളിലൂടെയും വോട്ടിംഗിലൂടെയും ഒന്നാമതെത്തുന്നയാളാണ് ടൈറ്റില് വിന്നര്. ശനി, ഞായര് എപ്പിസോഡുകളില് മാത്രമാവും ഷോയില് അവതാരകന് മോഹന്ലാലിന്റെ നേരിട്ടുള്ള സാന്നിധ്യം ഉണ്ടാവുക. ഓരോ വാരാന്ത്യത്തിലും മത്സരാര്ഥികളില് ഓരോരുത്തര് വീതം പുറത്താവുകയും (elemination) ചെയ്യും. എലിമിനേഷന് പൂര്ണമായും പ്രേക്ഷകരുടെ വോട്ടിംഗിന്റെ അടിസ്ഥാനത്തിലായിരിക്കും. പ്രതികൂല സാഹചര്യവും മറ്റ് മത്സരാര്ഥികള് ഉയര്ത്തുന്ന വെല്ലുവിളികളുമെല്ലാം നേരിട്ട് ബിഗ് ബോസ് ഹൗസില് 100 ദിവസം പൂര്ത്തിയാക്കുന്ന ഒരേയൊരാള് ആയിരിക്കും അന്തിമ വിജയി.
ഡിസ്നി സ്റ്റാര് ഗ്രൂപ്പിന് കീഴിലുള്ള വിവിധ ഭാഷാ ചാനലുകളാണ് ഇന്ത്യയില് ബിഗ് ബോസ് സംപ്രേഷണം ചെയ്യുന്നത്. മലയാളം ആദ്യ സീസണ് മുംബൈയിലായിരുന്നു. രണ്ടാം സീസണ് മുതല് ചെന്നൈ ഇ വി പി ഫിലിം സിറ്റിയിലേക്ക് മാറി.
Post a Comment