സൂക്ഷിക്കുക! മാസ്ക്ക് ധരിച്ചില്ലെങ്കിൽ പിഴ 5000 രൂപ

കൽപ്പറ്റ: മാസ്ക്ക് ധരിക്കാതെ പുറത്തിറങ്ങിയാൽ 5000 രൂപ വരെ പിഴ. 2011 ലെ കേരള പോലീസ് ആക്ടിലെ 129ാം വകുപ്പ് പ്രകാരം നൽകപ്പെട്ട അധികാരങ്ങൾ വിനിയോഗിച്ചു കൊണ്ട് സംസ്ഥാന സർക്കാർ ഉണ്ടാക്കിയ ചട്ടങ്ങൾ പ്രകാരമാണ് പിഴ ചുമത്തണ്ടത് സംബന്ധിച്ച് കൂടുതൽ വ്യക്തത വന്നിരിക്കുന്നത്. ഇത് പ്രകാരം കേരളാ പോലീസ് ആക്ട് 118 ഇ പ്രകാരം അറിഞ്ഞു കൊണ്ട് പൊതുജനങ്ങൾക്ക് അപായമുണ്ടാക്കുന്നതോ, പൊതു സുരക്ഷയിൽ വീഴ്ചയുണ്ടാക്കുന്നതോ ആയ ഏതെങ്കിലും പ്രവർത്തി ചെയ്താൽ 5000 ‌ രൂപ പിഴ ഈടാക്കാമെന്നാണ് 2020ലെ പുറത്തിറങ്ങിയ ചട്ടത്തിൽ പറയുന്നത്.
ഇത് പ്രകാരം മാസ്ക്ക് ധരിക്കാതെ പുറത്തിയാൽ 5000 രൂപ വരെ പിഴ ഈടാക്കാൻ വ്യവസ്ഥയുണ്ട്. കേസിൽ നിന്നും ഒഴിവാക്കണമെങ്കിൽ ജില്ലാ പോലീസ് മേധാവിക്ക് അപേക്ഷ നൽകി പിഴയടക്കാം. പ്രസ്തുത കേസ് കോടതിയിലെത്തിയാൽ പോലീസ് ആക്ട് 118 ന്റെ ലംഘനത്തിന് 3 വർഷം തടവോ , പതിനായിരം രൂപ പിഴയോ ഇത് രണ്ടും ഒരുമിച്ചോ ലഭിച്ചേക്കാം.

വ്യാപാര സ്ഥാപനങ്ങളുടെ കാര്യത്തിലാണെങ്കിൽ കടകളിൽ കൈ കഴുകാനുള്ള സംവിധാനവും ഏർപ്പെടുത്തണമെന്നാണ് നിർദേശം. കൂടാതെ കടയിൽ നിൽക്കുന്നവർ നിർബന്ധമായും മാസ്ക്ക് ധരിക്കുകയും വേണം. ഇല്ലെങ്കിൽ 1000 രൂപയാണ് പിഴ. പോലീസ് ആക്ട് 120(എൻ) പ്രകാരം വേണ്ടത്ര മുൻകരുതലില്ലാതെയും പൊതു സുരക്ഷ കണക്കിലെടുക്കാതെയും അയാൾക്ക് നിയന്ത്രണമുള്ള സ്ഥലത്തോ, പരിസരത്തോ അപകടകരമായോ എന്തെങ്കിലും പ്രവർത്തി ചെയ്യുക എന്ന കുറ്റ പ്രകാരം സ്റ്റേഷൻ ഹൗസ് ഓഫീസർ, എസ് ഐ എന്നിവർക്ക് കേസെടുക്കാം.

1000 രൂപയാണ് ഈ കുറ്റത്തിനുള്ള പിഴ. കേസ് കോടതിയിലെത്തിയാൽ ഒരു വർഷം തടവോ, 5000 രൂപ പിഴയോ ഈടാക്കാം. പുതുക്കിയ ചട്ടപ്രകാരം വിവിധ കുറ്റങ്ങൾക്കുള്ള പിഴ എത്രയാണെന്ന് വ്യക്തത വന്നിട്ടുണ്ട്.2011 ലെ പോലീസ് ആക്ട് പ്രകാരം പിഴയെ സംബന്ധിച്ചുള്ള അവ്യക്തതയാണ് ഇതോടെ ഇല്ലാതാവുന്നത്.